النفوس الشبعانة/بقلم الشاعر مرقص إقلاديوس

النفوس الشبعانة
بقلم ..مرقص إقلاديوس
.......
الموضوع صعب
فعاوزكم تركزوا ويايا.

لما الواحد يبص
للى فى إيدين غيره ،و يتمناه ليه.
فهو
إما بيغير منه
أو بيحسده
أو بيحقد عليه
لسه مركزين معايا.

اللى بيغير
يبذل أقصى طاقته عشان يوصل،
للى نفسه فيه.
و يتمنى
إن ربنا يبارك للى معاه،
و يا ريت كمان و كمان يديه.

اللى بيحسد
عاوز يوصل من غير تعب.
يقوللك
هرا اللى ييجى بالتعب يفرح.
يا راجل
ده الواحد يكون بقى شيخ،
لما الشجرة تطرح.

الغيرة إنسانية.
صاحبها نبيل القلب
مجتهد
و صافى النية.

اللى بيحسد
بيقولوا عليه فى العلم
فيه ناس كدة طبعها.
قبل ما تفكر فى واجبها
تفكر فى حقها.

انما اللى بيحقد
عاوز اللى معاه
يضيع منه اللى معاه.
حتى لو ما حصلش عليه
رغم كونه يتمناه.

المجموعة الرابعة
ناس عشت سنين ما اعرفهمش،
عقلى و قلبى ما فهمهمش.
جايز يتفهم
الحقد فى المزايا و الإيجابيات.
إنما غير منطقى
الحقد فى المصايب و السلبيات.
يعنى
تلاقى واحد عيان
يتمنى الباقيين يعيوا زيه.
واحد خسر رأسماله
عاوز الباقيين يخسروا  أكتر منه.
و غيره و غيره
يقوللك
مايقاسوش ليه زى ما قاسيت.
ما ينذلوش ليه
زى ما انذليت.
مش عارف بحقيقى
العينة دى من البشر تتوصف بإيه.
كنت فاكر  نفسى حريف كلمات،
لكن بصحيح
مش لاقى وصف ليه.

سامعك بتقوللى
ما فيش ناس كدة .
لأ فيه،
لا فيه.
طب لف لفة،
و ادرس بدقة.
هتلاقى
من العينة دى حواليك.
ارفع لفوق عينيك.
و اطلب من ربنا
ينجينا منهم و ينجيك.
           ملاح بحور الحكمة
           مرقص إقلاديوس