أمثال وأمثال / بقلم الشاعر مرقص إقلاديوس
امثال و امثال
بقلم..مرقص إقلاديوس
......
بيقولوا الأمثال..حكمة الشعوب.
عشان كلماتها بسيطة.
بيرددها اللسان..و تحفظها القلوب.
إنما فيه مثل
شرحه بيزود الألم فينا.
يقولك ..
رضينا بالهم..و الهم ما رضيش بينا.
سألته
إزاي يعنى يا بلدينا.
انا اللي افهمه
إن واحد ما يرضاش بالهم.
إنما يرضى بالهم
و كمان الهم ما يرضاش بيه.
ليه..هوا فيه إيه
اشرح لينا
ينوبك ثواب فينا يا بيه.
الناس بتعرف الهم
إنه المعاناة و الغلب.
و إن الحظ فى الحياة
يبقى قليل و صعب.
عشان كدة الناس فيها
اللي بيجتهد و يسعى.
و اللي يريح دماغه
و يقول مش قادر و ينسى.
و اللي عشان يحقق نفسه
يجور على غيره و يقسى.
عشان الواحد مننا
يحقق اى انجاز فى الحياة
لازم يجتهد
و ينوي النية للخير.
و يقول يا رب
و يبتدي
و
ربك وعد
إن اللي يجتهد
هينجح مسعاه
و الخير
هيحارب اللي بيجاربوه
و يكون معاه.
و إن
اللي يقول يا رب
فى الخير
دايما
هيتسمع نداه
يجيله الهم دم منين
ده الهم يحتار وياه
سامعك بتعترض
و المثل .. المثل
المثل غلط
يا صديقي المعترض
لأن
اللي بيرضي بالهم
الهم بيرضي بيه
ده كمان
بيصاحبه و ياخد عليه
و إن لم يراجع نفسه و يهتم
يعيش طول عمره
مع الأسف ..مع الألم
و ..هم ..يسلمه ..ل..هم.
صحصح
عشان تنجح
يا صاحبي .
ملاح بخور الحكمة
مرقص إقلاديوس
تعليقات
إرسال تعليق